Pilipinas

Pilipinas
Kapo-siti	Manila
Ofisi lingua	Pilipinas-linga
Area	300,000 km²

Pilipinas a ila-paisa en sude-ese Asia en Mare Pase. Paisa i ave a 7,641 ila. Espania (1521 - 1898) an Lan de-i Uno (1901 - 1946) i de koloni a paisa an Palau, ke en ese lado de Mar Pilipinas. Kapo-siti de Pilipinas a Manila.

Pilipinas an Timor Ese a solo paisa en Ese Asia, ke mui man a Kerusa-man. Pilipinas i gana a paisa-libera en 1898 unda Uno-Ranko Repubika Pilipinas de kapo-lida Emilio Aginaldo, an gen en 1946 afa Lan de-i Uno i de kite.

Ila Pilipinas e de-i rondo en ese de Pilipinas Mar, en vese de Sude Sina Mar, an en sude de Sulawesi Mar. Ila Borneo e some-sento kilo-mita eki go sud-vese. Vietnam e go vese, an Taiwan e direto o nore.

Gove

Gove de Pilipinas e sama go gove de Lan de-i Uno de Amerika. Paisa-lida de Pilipinas i labora sama kapo-man de lan, kapo-man de gove, an kapo-imperi-man de milita de paisa. Kapo-lida e de-i eleti de vote, sama en Amerika, pero via popula vote, ka no a Eleti Koleki (Electoral College). Si a an lida de Kabinete.

Duo-kamera Pilipinas make-jura rama, Kongres de Pilipinas, i ave a duo "kasa": Antika-Junta an Kasa de Vakili; memba de duo e de-i eleti de popula vote. A 24 antika-junta-man ke e de-i eleti go sita ano, vile Kasa de Vakili i ave no ma de 250 Kongres-man kon san ano tempo.

Deside-jura rama de gove e de-i kapo de Kapo Jura-Kamera, ke i ave uno Kapo Jura-man an 14 De-i Junta Jura-Man (Associate Justice), ale e de-i eleti de paisa-kapo.

Pilipinas a uno impotan memba de Junta de Sude-ese Asia Paisa (Association of Southeast Asian Nations; ASEAN). A an ato memba de Asia-Pase Ekonomi Junta-Labora (Asia-Pacific Economic Cooperation), memba de Junta de 24, an uno de 51 uno-ranko memba de De-i Uno Paisa-Paisa en 24 de Monato Ba, 1945.

Politi divi

Peso de Pilipinas i voka a "di-loke gove uno-diji" (local government units, LGUs). Gove-lan (province) a uno-ranko uno-diji. Da a 81 area-lan en paisa en 2015. En area-lan, da a siti an vila. En di siti an vila, da a navi-vila (barangay, de-i name afa di-loke navi). Navi-vila a da ma mini di-loke gove uno-diji.

Ale gove-lan e en gove-area (region). Mui ofisi de gove i ave gove-area ofisi go gove-lan. Gove-area i no ave divi di-loke gove, pero Musil Mindanaw an Kordiliera ofisi, ke i ave si-ego poten (ego-jura gove).

Lan-siensia

Pilipinas i ave a 7,641 ila. Da a 300,000 kilo-mita de-i kare de lan junta. Ila e en san junta: Luzon, Visayas, an Mindanaw. Luzon a da ma mega ila, sige de Mindanaw. Visayas a junta de ila en senta de Pilipinas. Bisi pota de Manila, en Luzon, a kapo-siti de Pilipinas. Da ma mega siti a Keson Siti (Quezon City), sige de Manila. Sebu Siti an Dabaw Siti a da ma mega siti en Visayas an Mindanaw.

Veta e fogo an e vasa-aero. Medi kalori-mesura go fule ano a 26.5 Celcius. Pilipinas-man pale ke a san tempo de ano: tag-init u tag-araw (kalori tempo de ano u soma), tag-ulan (regen tempo de ano), an tag-lamig (kula tempo de ano).

Pilipinas e en Pase Ringo de Fogo (area kon mui tera-vibe an fogo-monte). Mui de monte ila i de ave mui tropiko regen-foreta en antika tempo. Da ma tingi loke a Monte Apo kon 2,954 mita. Mui fogo-monte en paisa, sama Monte Mayon, e ato. En media, paisa i ave a 19 tufan en uno ano.

Fogo-Monte Taal e en a ila en Lago Taal. A antika fogo-monte-fura (caldera) en Batangas Gove-lan. E kasi duo ora en karo de Manila. Pota-loke en Talisay e bon go safari go fogo-monte.