Advertisement

Jurassic World: Dominion Dominates Fandom Wikis - The Loop

01:25

Leonardo da Vinci (1452-1519) - The Last Supper (1495-1498).jpg
Di pinta i demo a Jesu en senta de Fini Eve-Manja. Si e de-i pinta de Leonardo da Vinci inta 1495 an 1498.

Jesu de Nazareth, de-i savi an sama Jesu Kristo, a Juda guru an gen-figura-man de relijon ke veni a kapo figura de Kerusa-relijon. Kerusa-man i sige a demo de Jesu, i i toma sama vere a si name, an i puja sama Juda Mesia (sava-man) an gen-bodi de Deo. Si a uno de da ma fama an reo o man de-i savi en mundo tari.

Da ma de tari-man i aseta ke si a Juda-Man de loke de-i voka a Judea, en vila de-i voka a Nazareth, en ke a Israel nun. Si-ale i aseta an ke si e de-i pensa sama guru, sano-make-man, an ke si e de-i batisa de Jon Batisa-Man. Si e de-i kerusa en Jerusalem en imperi de Pontius Pilate, an Kerusa-man i keredo ke si veni baka go viva—en-i leva gen afa san dia.

Jesu i edu go ma-peso a amo an padon go ota, an en-e umile de si-uno relijon. Si i pale en mui tempo de raja-lan de Deo an i dire go ota, "Raja-lan de Deo i ave veni nea." Si i dire ke si-uno i debe e suave sama kinde, an i vanita-pale ni. Si i edu ke man ke pasa via de Deo an ota man e no sufi merite go si santi, pero Deo i da padon ankora a si-ale, se si-ale i senti e sori. Jesu i anti a ota Juda guru en da tempo ka si-ale i uti a relijon go-i vanita-pale.

Name

Name Jesu i veni de Arami name “Yeshua”, de Hebreu “Yah-shua”, en-i sinifi a “Deo a sava”, an si a popula name en da tempo. Jesu e de-i voka o mui tempo a “Jesu Kristo” u “Kristo”. Name “Kristo” i veni de Grekia name christos an i sinifi a “uno de-i manko en kapo kon ole”. En Jesu paisa, en-i ole-pone e de-i make go-i demo ke man e de-i eleti go-veni a raja u lida. Jesu e de-i voka an a Mesia, ke veni de Hebreu name Mashiakh, an i sinifi a “uno de-i ole.”

Viva en akonto de Mesaje Bon

Nati

Giotto - Scrovegni - -18- - Adoration of the Magi.jpg
Mati i dire ke saje man de Ese i veni pota a valu dona go bebe Jesu (de-i pinta de Joto/Giotto en 1300).

Bon Mesaje de Mati an Luk i dire ke, ante nati de Jesu, si-duo, Maria, si paren, an viro ke si e de-i janji go, Josef, i savi ke Jesu i go a Mesia u Raja ke e de-i janji go Juda popula, en antika Juda buku.

Mesaje Bon de Luk i pale a da ma de saga. Ven Jesu e de-i nati, Roma Imperi i imperi a da ma de Senta Ese. Gove i vole ke ale fami go-i ave a si name de-i toma unda go tarifa. Ale i de nese go baka a loke ke si veni de. Josef veni de mini vila de Bethlehem, nea Jerusalem, rason, tamen Maria e nea en-i nati a si bebe, si-ale nese safari kon kilo de ota man.

Ven si-ale veni go Bethlehem, ale kamera e fule. Jesu e de-i pone en manja-kaja ka a no loke go si-ale en otelo. Ovi-man ke i en ade a si ovi en lado de kolina i veni en go-i mira a bebe, an i veni eki en-i kanti a danke go Deo go nu-nati Raja.

En Bon Mesaje de Mati, si i dire ke saje viro de fara paisa i de mira a nu najima en selo an i safari go-i deteki a ujana Jesu ka si-ale i savi ke Mesia e de-i go nati unda najima, an ke najima e sino ke Jesu e de-i nati sama raja.

Vari Juda an Roma tari-man, sama Flavius Josefus, Takitus, Plini-Ujana, Suetonius, i kon a Jesu en si note. Si-ale i pale o ma tempo o solo de si mori u duro inta Roma gove an si sige-man; si-ale no pale de si viva.

Mani-Man, Nosis-Man, Musil-Man, Bahai-Man, an ota i ave deteki a impotan loke go Jesu en si relijon. En Islam, Jesu a Musil-Man. Bahai-Man edu i tema a Jesu sama “demo de Deo,” Bahai idea go navu-man. Some Indu-Man i tema a Jesu sama avatar u sadhu. Some Buda-Man, en-i kon a Tenzin Gyasto, 14-ranko Dalai Lama, i tema a Jesu sama bodhisatva ke i de dona a si viva go bene de man.

Da ma de Kerusa-Man i fete a dia ke Jesu e de-i nati sama vakansa de Jesu-Nati u Christmas. Tamen Bon Mesaje no dire a ke dia ke Jesu e de-i nati, 25 de 12-monato e de-i eleti, ka a Roma vakansa en da dia deja.

Labora

Veni de Jesu e de-i savi de Jon Batisa-Man. Si i batisa a Jesu en Jordan Rio. Vile de batisa, Anima de Deo, sama pase-tori, i veni unda en Jesu, an voka de Deo e de-i ia. En akonto de Biblia, Anima i direto a Jesu en saara, ve si i no-manja go 40 dia. Da-loke, si i pusa baka a tenta de demon. Den, Jesu i veni en go Galili, i make-domo en Kapernaum, an i begin guru de Raja-Lan de Deo. Si e rondo 30 ano.

Jesu i edu o kapo via saga. Si i edu ke solo Deo a vere raja, an ke man i debe amo a Deo an kada ota sama santi note i dire go si-ale go-i make. An si i edu a si sige-man a moda go-i dua. Jesu i make a santi-ato ke a sino de poten de Deo, sama en-i dona go famine man a manja an vino, en-i sano a maladi man, an en-i make a mori man e viva gen. Si i pone an a man e libera de mala anima.

Giotto Scrovegni 26 entry into Jerusalem detail.jpg
Jesu en-i veni en go Jerusalem, e de-i salu de masa de man ke uti a si kova an rama de igi go-i make a tape go si. Joto/Giotto 1300

Jesu i koleki junta a 12 man, de-i savi sama Ten-Duo Sige-Man, ke si i de eleti an edu go-i difuse a si mesaje. Si i ave a mui ota sige-man, en-i kon a mui feme, pero ka de Juda more, feme sige-man no kan safari go fara loke via si-ego sama guru.

Biblia i dire ke Jesu i de veni e fama. Si i go a Jerusalem, loke ke mui i en visita a siti go Pasa-Via. Ven si-ale i ia ke si i en veni, si-ale i salu a si sama se si a raja. Si-ale pensa ke si i da libera a si-ale de Roma Imperi, pero Jesu i veni en go Jerusalem en semi-kavalo sama sino ke si veni en pase.

Jesu i make a besonde kosa ke i inseto a Juda relijon lida. Si-ale pensa ke Si demo a no-venera go more ke Juda-Man i ave kipa go mui sento-ano. Go demo, Juda-Man no make a ale en 7-ranko dia de semana, Sabath, ka si a santi dia. En Bon Mesaje de Jon, peso 5, a saga de Jesu en-i sano a no-kan-kamina viro. Jesu i mira ke viro en-i resi en kama. Si i sano a viro an i dire a si go-i toma supa a kama an i go a domo. En-i pota a kama en Sabath e anti relijon more, rason, relijon-lida i debate kon Jesu de si. Si-ale mira den a ale ke si make, an i memo a ale kosa ke e anti relijon more.

En Bon Mesaje de Mark, peso 11, si i dire ke ven Jesu veni en Jerusalem, si go a Juda Puja-Kasa. Si i veni e koleri go kosa ke si mira. A mui man en-i vende da a kosa, an mone-kambio-man ke i en ruse a pove man. Jesu i jage eki a ale man ke i en vende a kosa. Si i dire ke kapo guru an note-man i ave muta a puja-kasa go kasa de robare-man ka si-ale i en make a mone de pove man an en-i toma eki a domo de pove feme ke no ave a ota moda go-i paga go puja-kasa puja.

Mori

Bon Mesaje i dire ke lida de puja-kasa e furi an i vole mori a Si. Si-ale i dire go Roma gove ke Jesu sige-man i vole ke Si i veni a raja de paisa, an i kapa a si. Bon Mesaje i dire ke Roma gove-lida i pensa ke Jesu i debe e de-i lase e libera, pero ke Juda lida i dire a “Se tu make a da, den tu a no amigo de Kesar!” (Kesar a Roma lida.)

Gove-lida i sentense a Si go mori, ka Si sige-man i ave dire ke Si a raja. Roma milita-man i mori a Jesu via kerusa. Si e de-i pin supa go tingi kerusa de si o mano an pedi. Da a komun moda go Roma-man go-i mori a rebele-man an ofensa-man.

Jesu bodi e de-i fosi en tumba de uno de Si sige-man. En dia afa Sabat, rano en maten, feme i de go terapi a bodi kon masala an aroma ole. Pero Bon Mesaje i dire ke bodi de Jesu e de-i go, an ke Si e de-i mira e viva afa. Di e de-i voka a Gen-Viva.

Some man, sama sige-man Tomas, i dire a "Mi no go keredo a di, tila mi ave mira kon mi-ego oko!" Pero Biblia i dire ke ma sama 500 man, en-i kon a Tomas, i de mira Jesu e viva gen. A mui saga en Bon Mesaje de ke Jesu i make afa Si e de-i gen-viva. Fini, Bon Mesaje de Luk i dire ke Jesu i toma a Si sige-man go kolina, ve Si i santi a si-ale an i dire go si-ale go-i difusi a Si edu via ale mundo, an ke den nube i veni unda, an Si e de-i leva supa go Selo.

Da ma de Kerusa-man i fete a tempo ke Bon Mesaje i dire ke Si i mori an e de-i leva de mori sama santi-dia de Paska u Easter.

Kerusa-man keredo de Jesu an si edu

Kerusa Santi-Kasa e de-i base en Jesu. Kosa ke Kerusa-man i keredo de Jesu e de-i base en fo Bon Mesaje de Biblia, an en koreo u "Epistoli" ke e de-i note en uno-ranko sento-ano, de-i eki-dire a Jesu edu go Si sige-man.

Jesu no note a di koreo. Si e de-i note en ma peso de Juda man de-i name a Pal. En begin, si i tenta para a kerusa-relijon de en-i difusi. Den, si i veni a kerusa-man si-ego an i de a impotan lida. Kon kerusa santi-kasa en vari vila an paisa, Pal i note a koreo go si-ale. Mui de idea ke kerusa-man i keredo e de-i note en Pal koreo. A mui de jura go-i direto a santi-kasa an fami, an.

A ota koreo en Nu Dalili de ota note-man en-i kon a Pita, Jakob, an Jon. Ale di koreo i ade make a keredo ke nun-dia kerusa-man i ave.

Jesu sama Deo

Christ pantocrator daphne1090-1100.jpg
Di peso-pinta de 1100, Atena, i demo a Jesu sama Jura-Deside-Man de Tera.

Se u no Jesu a Deo i ave en debate go longo tempo. Da ma de kerusa-man, en-i kon a da de Katolika, Dereka, an Nu-Figura peso, i keredo ke Jesu a Deo an man, duo. Jesu e de-i eki-dire en vari peso de Nu Dalili sama "Name de Deo", "Fili de Deo", "Fili de Man", an Deo si-ego. Di edu, ke e de-i keredo de da ma de kerusa-man, e no de-i keredo de mui ota man. Islam edu e ke Jesu a navu-man, pero a no peso de Deo u "Fili de Deo". En Jesu si-ego tempo, mui de Juda-man i veni e furi en Jesu go en-i dire ke si a "Fili de Deo" an ka si sige-man i dire ke si a "Mesia". Da ma de Juda-man no keredo a di.

Di Biblia sentense i dire a Kerusa-man edu ke Jesu a Deo:

En begin a Name, an Name e kon Deo, an Name a Deo. Si-viro e en begin kon Deo. Jon 1:1-3

An Name i veni a bodi an i domo kon mi-ale, an mi-ale i ave mira a si fama, fama de solo Fili de Paren, fule de favo an vere. Jon 1:14

Mi an Paren a uno. John 10:30

Fami-kapo a ave de si-ale, an de si-ale rasa, en-i akonto go bodi, a Kristo, ke a Deo via ale, de-i santi tuju. Amen. Roma-man 9:5

En-i arapan go mi-ale santi arapan, apara de fama de mi-ale mega Deo an sava-man Jesu Kristo. Titus 2:13

Go ke en si, ale fule-neso de deo i domo o bodi. Kolosai-man 2:9

Jesu e de-i refere an sama "Fili de Deo".

An Name i veni a bodi an i domo kon mi-ale, an mi-ale i ave mira a si fama, fama de solo Fili de Paren, fule de favo an vere. Jon 1:14

Pero en di fini dia, si i ave dire go mi-ale via si Fili, ke si i name a gene-man de ale kosa, via ke si i make a mundo. Si a luse de fama de Deo an esato sino de si natura, an si i supa-teni a univesa via name de si poten. Afa en-i make e pura go si mala ato, si i sede unda en dereka mano de Raja en tingi Hebreu 1:2-3

An mi-ale i savi ke Fili de Deo i ave veni an i ave dona go mi-ale a savi, go ke mi-ale i kan savi a si, ke e vere; an mi-ale e en si, ke e vere, en si Fili Jesu Kristo. Si a vere Deo an tuju-kipa viva. 1 Jon 5:20

Mui kerusa-man i keredo ke di sentense i dire ke Jesu a Deo. Ale kerusa-man i keredo ke Jesu mori en kerusa i lase ke ale man e de-i padon de Deo go si mala ato. Da ma de kerusa-man i keredo ke si man i roga a Deo go-i padon a si, Si i go make so, an si i go viva tuju kon si en Selo.

Deo en figura de man

Rembrandt Harmensz. van Rijn 048.jpg
Jesu de-i pinta de Rembrandt, Unda-Lan, 1600 ten-ano. Rembrandt i uti a Juda viro sama modelo.

Mui kerusa-man i keredo ke, via edu de Biblia, Jesu a no solo vere Deo pero an-an vere man an ke di a peso de Deo ajenda go-i pone a man, ma nea go-i savi a si. Man ke no ave kerusa-man keredo i ave ota idea de Jesu.

Sentense de Biblia:

An Name i veni a bodi an i domo kon mi-ale. Jon 1:14

En Bon Mesaje de Mati, Jesu e de-i voka en mui tempo a "Fili de Deo". Mati i toma a di name de Antika Dalili, ve si-ale e de-i uti demo ke man e mui fara de Deo. En Biblia, Deo e de-i puja an danke en mui tempo go en-i ade a komun man, ke e de-i voka a "fili de man". En Puja-Kanti 8, note-man Raja David, i roga a Deo a ke a man ke tu e menta-fule de si, an fili de man ke tu ade a si?

En Bon Mesaje de Mati, 24:30, Jesu i dire a Den, sino de Fili de Man i go apara, an den, ale popula de tera i go melankoli, an si-ale i go mira a Fili de Man en-i veni en nube de selo kon poten an mega fama. Sama Raja David, en Puja-Kanti 8, Jesu i en make a muta inta si komun man viva an si mega poten sama Fili de Deo.

"Bon Ovi-Man "

Uno de peso de-i amo o da ma a Puja-Kanti 23. Si i begin:

Senjore a mi ovi-man; mi no go vole. Si i make ke mi pone unda en midori kampo. Si i lado a mi en lado de pase vasa.

En Bon Mesaje, Jesu i dire en mui tempo de si-ego sama ovi-man en-i ade a ovi. Si i voka a si-ego a "Bon Ovi-Man" ke ankora da dona a si-ego viva go-i defende a si ovi. Si i dire a Juda popula, en-i refere go no-Juda-man u Jentile keredo-man, ke si i ave a ota ovi ke e no peso de di ovi-junta. En uno de si fini pale kon si sige-man Pita, si i dire a si a I dona a manja go mi ovi!", en ota name, I dona a ade go mi popula.

"Santi Sava-Man "

En Juda-relijon, de antika tempo, man e de-i mira sama mala. Si-ale i keredo ke a duo moda go-i veni ave a padon de Deo, via dua an via ofera. Man i kan make a dua en ani loke, pero ofera i nese pasa en puja-kasa. Man i da toma a animale, en mui tempo, ovi, u se si-ale e pove, tori. Si-ale da pone a si mano en animale go-i pone unda a si malo ato en si. Den, animale i da e de-i mori, sama puni go mala ato. Di tipo de ofera i kipa pasa tila puja-kasa de Jerusalem e de-i runa en 71 AD. En-i paga a mone go puja-kasa a tipo ofera, an. Ven Jesu eki-sende a kambio-man de puja-kasa, si-ale a man ke vende a ovi an tori, an man ke i kambio a Roma mone en-go besonde puja-kasa mone.

Peso de kerusa-man keredo e ke Jesu Kristo no veni jusa sama man go ke si kan edu a ma bon o moda de viva. Kerusa-man i keredo an ke Jesu a fini ofera go mala ato de ale man, ke Jesu a sava-man: man ke e en di go-i sava. Kerusa-man i keredo ke, no sama komun man, Jesu e ale pura an libera de mala ato, pero ven si i mori en kerusa, si i toma en si-ego a ale mala ato de ale man ke i da keredo en si, sama ovi de-i ofera en puja-kasa.

De-i base en Bon Mesaje de Jon, kerusa-man edu e ke mori an gen-viva de Jesu a sino de si poten go-i padon a mala ato de ani man ke jira go si an i roga vere go padon. Biblia i dire ke mala-ato-man ke e de-i padon i debe tenta viva a nu viva an i no go baka go si mala-fule moda. Kerusa-man i keredo ke en-i savi de Deo amo i ade a man go-i viva a nu an ma bon o viva.

Di a san sentense de Biblia ke e impotan en kerusa-man keredo:

Ka Deo i amo so a mundo ke si i dona a si solo Fili, go ke ani man ke keredo en si no debe mori pero i ave a tuju-kipa viva. Jon 3:16

Jesu i dire go si a "Mi a moda, vere, an viva. Nulo i veni go Paren pero via mi. Jon 14:6

Se mi-ale i dire ke mi no ave a mala ato, mi i en ruse a mi-ego an i no dire a vere. Pero se mi-ale i dire o umile a mi mala ato go Deo, den, si i ave janji ia an padon a mi mala ato an make a mi e pura de ale de mi mala-neso. de uno-ranko koreo de Jon

Ota mira de Jesu

Jesu sama guru

Some man ke a no kerusa-man i keredo ke Jesu i viva en da tempo ke Bon Mesaje i dire, pero i no keredo ke Jesu a "Fili de Deo" u "Sava-Man". Si-ale i keredo ke Jesu a komun pero mui bon o man, guru, an mebi, navu-man.

Musil-man keredo de Jesu

Musil-man i keredo ke Jesu a duo-ranko-go-fini Navu-Man an mesaje-man de Deo. Si-ale i keredo ke Mohamad a vere fini Navu-Man. Si-ale i keredo ke Jesu an Mohamad, duo, a komun man, de-i eleti de Deo go-a si dulo an go-i edu a name de Islam.

Musil-man no keredo ke Jesu a Deo u "Fili de Deo". Islam e severe uno-deo: si i dire ke a solo uno Deo. Musil-man i keredo ke Jesu no kan a peso de Deo, ka a solo uno Deo. Se some man ota sama Deo e de-i puja, si e de-i pensa sama mui-deo-relijon. Si a figura de kosa-puja, an: en-i puja a kosa en loke de Deo.

Islam i edu ke Jesu i de no mori en kerusa, pero ota man de-i osura sama si i go en si loke (Koran 4:157). Di e mui ota de kerusa-relijon. Jesu mori a impotan peso de kerusa-man keredo de sava. Musil-man tuju dire "i lase ke pase e en si" afa en-i dire a Jesu name sama sino de venera.

Musil-man i aseta an a some ota edu de Jesu. Di edu i dire ke Jesu i go veni go tera en Fini de Dia; si i go ruina den a no-vere mesiah u Anti-Kristo ante dia de deside. Musil-man i aseta an a Jesu o dire ke si a sano-man. Si-ale i keredo en mui santi-vunda ke si i ave make, sama en-i leva a mori man go viva an en-i dona a mira go no-mira-man. Si-ale i keredo ke ale de si santi-vunda e de-i dona go si de Deo.

Koran (sama Biblia) i refere a no-sesi nati de Jesu pero den si i dire a ota kosa de Maria (Maryam en Islam). Biblia i dire ke Josef i ade a Mari go-i nati a Jesu, pero en Islam, a no Josef. En loke de da, Maria i kamina en saara solo en labora an i deteki a igi. Furi anjo Gabriel (Jibril) i roga se si e famine, den, i dire a si go-i vibe a igi an suga-feruta i unda go si go-i manja. Den, si i roga se si e sete an si i dire mira unda en tu pedi an, en da, a vasa an en da, si i nati a Jesu (Koran 19). Di a rason ke Musil-man i no-manja-rite an a moda ke si-ale i rompe a si no-manja-rite. Mari i savi ke si i ave go baka go si vila an ven si i de go, kon Jesu en si rama, man i en jeritan go si ka de no-fide-neso. Maria i de vole eki-dire a ke i pasa, pero anjo i dire a si go-i no dire.

Juda keredo de Jesu

Tamen Jesu a Juda-man an si edu i veni eki de Juda relijon, da ma de Juda-man no keredo ke Jesu a Mesia ke e de-i janji en Santi Noti.

En Bon Mesaje, si i dire ke Jesu i make a Juda edu-man e mui furi kon si edu. Si i dire ke peso de si furi e ka si i dire a si-ale ke si-ale e duo-fase ka si-ale i apara go eki mundo go-i viva e santi, pero en si en-en kore, si e fara de Deo.

En Bon Mesaje, ota rason ke si-ale i veni e furi e ka Jesu i ato sama ke si a Mesia, an i dire ke si a "Fili de Deo." Di i sinifi ke si a mala mentira-man u lke si e loko, u ke si o dire e vere. Pero Jesu no apara e loko. Se Jesu i en mentira, den, si i make a mala kosa anti Juda relijon. Ka de di dire ke Jesu a Fili de Deo, some de Juda-man lida i vole mori a si, an si-ale i toma a si go Roma lida. Roma-man no vori se Jesu i dire a kosa ke e anti keredo de Juda-man. Pero si-ale i savi ke mui man i ave dire ke Jesu a "Raja de Juda-Man". Juda-man lida i dire ke si e anti Roma gove jura. Tamen Roma lida no aseta, si-ale i mori a si go-i para a mebi jalan-bata.

Tamen, di-dia an via tari, da ma de Juda-man no keredo a ke Kerusa-man i dire de Jesu, a some Juda-man ke ja keredo ke Jesu a Mesia de-i janji en Juda Santi-Note. Juda-man ke keredo a di e de-i voka a Mesia-Juda-Man.

Moda ke Bon Mesaje e de-i note

Nea ale nun-dia etudi-man, kerusa-man an no-kerusa-man duo, i aseta ke Jesu a vere man. Kerusa-man an no-kerusa-man o etudi-man i base a si etudi de si en Bon Mesaje, ke e de-i note inta 60 go 90 AD.

De more, Bon Mesaje e de-i note de fo viro, Mati, Mark, Luk, an Jon, ke i dona a si name go di buku. Di a ranko en ke si-ale e de-i pone en Nu Dalili de Biblia, pero sekola-man i pensa ke si a no ranko en ke si-ale e de-i note orijen. Bon Mesaje de Mark e de-i note ma-mebi ante Bon Mesaje de Mati. Fo Bon Mesaje ale i dire a saga de viva de Jesu, pero si-ale i make a di de fo ota punto de mira, ka si-ale e de-i note de ota man an kada note-man i ave a rason go-i dire a si en ota moda.

Christ with beard.jpg
En-i dia de 4-ranko sento-ano Roma, di a da ma antika pinta de-i savi de Jesu en-i demo a si sama boroda Semite viro, en loke de raso, bajo-pelo Roma viro.

De Mark

Bon Mesaje de Mark, ke e de-i pensa go-e da ma rano, i ave a name de ujana sige-man de Pal, ke e de-i refere en mui tempo en "Ato de Sige-Man" an Koreo de Pal. Bon Mesaje e de-i note ma-mebi en Roma an e de-i pensa de sekola-man go-e de memo de Jesu sige-man, Pita. Si no dire de Jesu nati; si i begin ven si e 30 ano en tempo ke sige-man i begin savi a si. Si i demo Jesu sama man de ato: en-i go rondo de paisa, en-i edu an sano a popula.

De Mati

Bon Mesaje de Mati e de-i note sige. Mati a uno de Jesu sige-man. Si a Juda viro ke e de-i odi de ota Jusa-man ka si i labora go Roma jura-man sama tarifa-man. Mati i dire ke uno dia, Jesu i mira a si en-i sede en si mesa en basara an i dire a "I sige a mi!" Da ma de Biblia sekola-man i keredo ke Mati i ave leje a Bon Mesaje de Mark an i deside fule en a some kosa ke Mark i kipa eki, ka, vile Mark i note a si Bon Mesaje go Santi-Kasa de roma, Mati i vole note go Juda kerusa-man ale via Roma Imperi. Mati a Juda-man de-i edu bon, rason, si i savi a Juda Santi-Note (ke kerusa-man i uti an, an i voka a Antika Dalili de Biblia). Mati i savi a santi-note edu ke Mesia, u uno de-i santi-ole de Deo, i da veni. En si Bon Mesaje, si mui-tempo refere a di edu. Si i begin kon seri de Jesu ante-fami-man ka di e impotan go Juda leje-man.

De Luk

Icon 01011 Bogorodica Kazanskaya.jpg
Jesu, sama kinde, kon si paren, Maria. Di imaje e de-i voka a "Theotokos de Kazan".

Sige-man Luk a Grekia-man an amigo de sige-man Pal. Si a medika-man. Luk i de veni savi de Jesu de sige-man. Luk i note de nati an kinde-tempo de Jesu an si i dire a "Maria i kipa a ale di kosa en si kore an i pensa de si-ale."

Luk a no Juda-man an si i note en moda de e fasile go ota man ke e no Juda go-i savi. Si i eki-dire a Juda more an jura. Si i note a duo-ranko buku de-i voka a Ato de Sige-Man, ke dire a ke sige-man i make afa Jesu i kite a si-ale.

De Jon

Sekola-man de Biblia i keredo ke Jon a sige-man de Jesu an e ma-mebi da ma ujana de ten-duo viro ke a Jesu kapo sige-man. Si i viva veni a antika viro, an ka de si edu de Jesu, si e de-i sende go mini ila, de-i voka a Patmos. Jon i note kon uno besonde idea en menta. Si i vole dalili go leje-man ke Jesu a moda de Deo de en-i sava a man de mega duro de mala. Jon i begin kon en-i dire a leje-man ke Jesu a Deo. Jon i dire ke Jesu a Viva Name de Deo. Ale peso de Bon Mesaje de Jon e de-i note go-i demo ke Jesu i veni de Deo, i edu a Mesaje de Deo an a moda go popula go-i savi a Amo de Deo.

Edu kon saga

Bon Mesaje i dire a mui de saga ke Jesu i dire ven si i en edu a man de moda ke Deo i amo a si-ale an moda ke si-ale i deve viva. Di e de-i voka a edu-saga. Si-ale i kon a sige:

Johns 10.JPG
Santi-kasa ventana kon saga de Bon Samaritan-man.


Bon Samarita-Man

En di saga de peso 10 de Bon Mesaje de Luk, Jesu i demo a ke si i sinifi go-a bon nea-man. Popula de-i voka a Samari-man i viva nea go Juda-man. Si no aseta kon kada ota de relijon edu an a enemi. Uno dia, Juda viro i en kamina, ven some robare-man i bata a si, i robare a si, an i kite a si e nudi an kasi mori en lado de jalan. Juda guru i veni o lado an i mira a si. Si i pensa, "Se mi i senti a da viro en-i sange, mi go e no-pura an mi no kan go a puja-kasa!" Rason, si i ruse ke si no ave mira a si-ota. Ota Juda-man, uno santi viro, i veni o lado an i ato en sama o moda. En fini, Samari-man i veni o lado kon semi-kavalo. Ven si i mira a viro de-i inja, si i para. Si i lava a si inja kon vino an ole. Den, si i pone a si-ota en si semi-kavalo an i toma a si-ota go da ma nea o otelo. Si i paga otelo-man an i dire a "I kipa a si tila si e sano, an ani kosa ke si e de-i debe, mi go paga ven mi veni baka en di moda." Jesu i dire go man ke i en ia a "Ke uno de di man i ato sama bon nea-man?" Si-ale dire a "Si ke para an ade." Jesu dire a "I go an ato a sama o moda."

Disipa-tenden Fili

En di saga de peso 15 de Bon Mesaje de Luk, Jesu dire de rika viro an si duo file. Si-duo i da risiti a peso de mone de paren ven si mori. Ujana fili i dire a "Paren, i dona go mi a mi mone nun, go ke mi kan go an joli a mi-ego, vile mi e ujana." Si i toma a mone go siti, an i paga a ale si en fete kon si amigo an ota mala kosa. Sun, si no ave a ani kipa go-i uti manja an si e de-i umile. Si i toma a labora en-i ade a pigi, tipo de no-santi niku go-i manja, jusa go-i kipa de en-i famine. Si i dire go si-ego a "Mi go a domo, go mi paren, mi go dire, 'Paren, Mi ave ato mala! I favo lase ke mi a dulo en tu kasa!" Ven si paren i mira a si en-i veni, si i kuri en lado de jalan go-i pone a si rama en rondo de si fili. Paren i dire a "I toma a da ma lujo o ropa! I mori a da ma dika o bovi go-i make a fete!" Ven ma antika o sibi i de ia a ale di, si e furi an i dire a "Mi a bon fili go tu, pero tu ni ankora dona go mi a uno mini teke go-i ave a fete kon mi amigo!" Paren i dire a "Tu tuju ave kipa kon mi. Mi amo tu mega, an ale ke mi ave e tu, pero mi fili ke e lose, nun e deteki! Mi fili ke apara e mori, e viva! I veni e joli kon mi!" Jesu dire ke di a moda ke Deo i amo an padon a si popula, ven si-ale i roga go padon.

Foli de-i relate

Note

Refere

Community content is available under CC-BY-SA unless otherwise noted.