Imaje de teoria-sentense en Eukleidis, teoria-sentense de Pitagoras: kare en longo-lado de san-lado dereka-kona e egala go suma de kare en lado duo ota.
Sentence 35 de Buku III de Peso Beso de Eukleidis: "Se, en rondo, lino dereka duo i kata en ota uno, den, dereka-kona (rectangle) e de-i kaja de peso de uno i egala a dereka-kona de-i kaja de peso de ota."
Eukleidis de Aleksandria (Grekia: Εὐκλείδης) a matemati-man Grekia ke viva en Aleksandria, Egipto an labora en Buku-Kasa Aleksandria. Mini e de-i savi de man di, pero man mui i pensa ke si viva da en tenpo ke Tolemi I a Farao. Si e de-i savi no en loke ke an en tenpo ke si e de-i nati.
Peso base
Eukleidis i koleki junta a ale ke e de-i savi en figura-siensa, ke e peso de matemati. Peso Base si a orijen kapo de figura-siensa antika. Savi-buku de-i base en Eukleidis i ave e de-i uti en tila dia nun-moda. En buku, si eki-begin de koleki mini de base-vere (ke a junta de kosa ke man ale i pensa e vere). Eukleidis i demo a kalite de kosa figura-siensa an de numa fule, de-i base en base-vere da.
Peso Base i kon an a labora en mira-loke, kono-peso (conic section), figura-siensa balo, an, mebi, kare-pele (quadratic surfaces). Eki de figura-siensa, labora i kon an a teoria numa. Eukleidis i revela a idea de divi-numa komun o mega ma da (greatest common divisors). Si ale e en Peso Base o si viro. Divi-numa komun o mega ma da de numa duo ani a numa o mega ma da ke kan divi suave a numa duo da.
Sitema figura-siensa de-i eki-dire en Peso Base e de-i savi longo base sama figura-siensa, an e de-i pensa go-a figura-siensa mebi solo. Nun-dia, sitema da e de-i mensi sama figura-siensa Eukleidis, go-i ota a si, de figura-siensa no-Eukleidis so-de-i-name, ke matemati-man i de develo en sento-ano o numa 19.
Labora ota
An-an go Peso Base, labora penta de Eukleidis en meno da i ave kipa-viva go nun-dia. Si ale i sige a figura loji sama Peso Base, kon name-sini an sentense de-i vere-demo.
- Data i pale de natura an sini de info de-i dona en duro figura-siensa; tema e de-i fami poten go buku fo o numa uno de Peso Base.
- En Divi-Tion de Figura, ke kipa-viva peso solo en via-linga Arabia, i pale de divi-tion de figura de figura-siensa en-go peso egala o duo u ma, u en-go peso en ratio de-i dona. Si e sama labora de sento-ano AK o numa san de Heron de Aleksandria.
- Katoptriks, ke pale de teoria matemati de ego-ventana, en peso inpotan ma, imaje de-i make en area foli an ventana balo en-benda. E dubi ke Eukleidis i de note a labora di. Make-man si i mebi a Teon de Aleksandria.
- Faenomena, note en najima-siensa balo, i kipa-viva en Grekia-linga; si e sama De Balo en-i Move de Autoklikus de Pitane, ke viva en AK 310 rondo.
Venera-dona go Eukleidis
- Vaku-roka e de-i name en sige Eukleidis.
- Fule mega en luna e de-i name en sife Eukleidis
Uno de peso o antika ma da de-i kipa-viva de Peso Base de Eukleidis e de-i dia go AfK 100 rondo. Imaje i kon a Buku II, Sentense 5.